Nyuma y’isiganwa rya mbere ryiswe “Kibugabuga Race” ryabaye mu 2021, ku nshuro ya kabiri, Akarere ka Bugesera kagiye kongera kwakira iri siganwa rizitabirwa n’ibyiciro bitatu; abagabo, abagore n’ingimbi tariki ya 20 Kanama 2022.

Mu bagabo, Mugisha Samuel ukinira ProTouch yo muri Afurika y’Epfo, niwe wegukanye Kibugabuga Race ya mbere, mu bagore aba Mukashema Josiane wa Benediction Club mu gihe ingimbi yahize abanda yari Iradukunda Valens wa Twin Lakes.

Amakipe 11 y’Abanyamuryango b’Ishyirahamwe ry’umukino w’amagare mu Rwanda “FERWACY”, atatu ya Continental ariyo Benediction Ignite, Pro Touch na May Stars n’andi atanu niyo yatumiwe.

Isiganwa rizatangira saa yine mu byiciro bitatu, abagabo bazakina Km 116 bahagurukiye i Kabuga mu murenge wa Masaka bace i Kanombe – Kabeza bazamukire muri Kicukiro basoreze mu Bugesera muri Nyarugenge kuri GS Kamabuye.

Abagore n’ingimbi bo bazakina Km 86 bahagurukire i Nyanza ya Kicukiro.